തലശ്ശേരി മുൻസിപ്പാലിറ്റി ഇരുപത്തിയൊൻപതാം വാർഡിൽ ഉൾപ്പെട്ട മീത്തൽ വയലിൽ ജപ്പാൻ കുടിവെള്ള പദ്ധതിക്കായി റോഡ് കുഴിച്ചതിന് ശേഷം പുനർനിർമാണം നടത്താത്തതിൽ വ്യാപക പ്രതിഷേധം. പൈപ്പിടലിനായി റോഡ് തകർത്തിട്ട് ഇപ്പോൾ ഒരു വർഷത്തിലേറെയായിട്ടും ശോചനീയാവസ്ഥയ്ക്ക് യാതൊരു പരിഹാരവും ഉണ്ടായിട്ടില്ലെന്നാണ് നാട്ടുകാരുടെ ആക്ഷേപം.
റോഡിന്റെ തകർച്ച കാരണം പ്രദേശവാസികളും വാഹനയാത്രികരും നിത്യേന വലിയ ബുദ്ധിമുട്ടാണ് നേരിടുന്നത്. മഴക്കാലം ആരംഭിച്ചതോടെ ഈ ഭാഗങ്ങളിൽ അപകടസാധ്യത പലമടങ്ങ് വർധിച്ചിരിക്കുകയാണ്. നിരവധി തവണ വാർഡ് മെമ്പറെ നേരിട്ട് കണ്ട് പരാതി ബോധിപ്പിച്ചിട്ടും ഇതുവരെ യാതൊരുവിധ അനുകൂല നടപടിയും അധികൃതരുടെ ഭാഗത്തുനിന്നും ഉണ്ടായിട്ടില്ല.
റോഡ് പുനർനിർമാണ പ്രവർത്തനങ്ങൾ സമയബന്ധിതമായി പൂർത്തിയാക്കാത്തതാണ് നിലവിലെ ഈ ദുരവസ്ഥയ്ക്ക് കാരണം. ഒരു വർഷത്തിലേറെയായി ജനങ്ങളെ ദുരിതത്തിലാക്കുന്ന ഈ പ്രശ്നത്തിന് അടിയന്തര പരിഹാരം കാണണമെന്നും റോഡ് എത്രയും വേഗം സഞ്ചാരയോഗ്യമാക്കാൻ ബന്ധപ്പെട്ട ഉയർന്ന അധികൃതർ ഇടപെടണമെന്നുമാണ് മീത്തൽ വയൽ നിവാസികളുടെ ആവശ്യം.
