തലശ്ശേരി: തലശ്ശേരി ആസ്ഥാനമായി പ്രവർത്തിക്കുന്ന 6 കേരളാ ബറ്റാലിയന്റെ വാർഷിക പരിശീലന ക്യാമ്പ് തലശ്ശേരി സബ് കളക്ടർ കാർത്തിക് പാണിഗ്രാഹി സന്ദർശിച്ചു. പിണറായി എ.കെ.ജി സ്മാരക ഗവ. ഹയർ സെക്കണ്ടറി സ്കൂളിൽ നടന്ന ചടങ്ങിൽ കേഡറ്റുകളെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
സമൂഹത്തിൽ സന്നദ്ധസേവനത്തിന്റെ പ്രാധാന്യത്തെക്കുറിച്ച് സംസാരിക്കവെ, അടുത്തിടെ തലശ്ശേരിയിലുണ്ടായ തീപിടുത്തത്തിൽ പ്രദേശവാസികൾ നടത്തിയ ധീരമായ രക്ഷാപ്രവർത്തനത്തെ അദ്ദേഹം അനുസ്മരിച്ചു. അടിയന്തര സാഹചര്യങ്ങളിൽ ഇത്തരം സമയോചിതമായ ഇടപെടലുകൾ നടത്താൻ കേഡറ്റുകൾ സജ്ജരാകണമെന്ന് അദ്ദേഹം ആഹ്വാനം ചെയ്തു. വിവിധ മേഖലകളിൽ മികച്ച നേട്ടങ്ങൾ കൈവരിച്ച എൻ.സി.സി കേഡറ്റുകളെ ചടങ്ങിൽ അദ്ദേഹം ആദരിച്ചു.
ക്യാമ്പ് കമാൻഡന്റ് കേണൽ വികാസ് ജയിൻ അധ്യക്ഷത വഹിച്ച ചടങ്ങിൽ ഡെപ്യൂട്ടി ക്യാമ്പ് കമാൻഡന്റ് കേണൽ സഞ്ജയ് പിള്ളൈ, കോളേജ് ഓഫ് എൻജിനീയറിങ് തലശ്ശേരി പ്രിൻസിപ്പാൾ ഡോ. എബി ഡേവിഡ്, എ.കെ.ജി മെമ്മോറിയൽ സ്കൂൾ പ്രിൻസിപ്പാൾ ശ്രീജിത്ത് പി, ഹെഡ്മാസ്റ്റർ ജയേഷ് വി, സുബേദാർ മേജർ എഡ്വിൻ ജോസ് എന്നിവർ പങ്കെടുത്തു.
ഡിസംബർ 24-ന് ആരംഭിച്ച ക്യാമ്പിൽ ഫയറിംഗ്, മാപ്പ് റീഡിംഗ്, ടെന്റ് പിച്ചിംഗ്, ഡ്രിൽ, ആയുധ പരിശീലനം തുടങ്ങി വിവിധ വിഷയങ്ങളിൽ പരിശീലനം നൽകി. രണ്ട് ബറ്റാലിയനുകളിലെ 26 സ്ഥാപനങ്ങളിൽ നിന്നായി 421 കേഡറ്റുകളും ഓഫീസർമാരും ഇൻസ്ട്രക്ടർമാരും ക്യാമ്പിൽ പങ്കെടുക്കുന്നുണ്ട്. പത്തുദിവസം നീണ്ടുനിന്ന പരിശീലന ക്യാമ്പ് ജനുവരി 2-ന് സമാപിക്കും.
