തലശ്ശേരി കോടതി സമുച്ചയത്തിന്റെ കോമ്ബൗണ്ടില് സ്ഥിതി ചെയ്യുന്ന, പഴയ അഡീഷണല് ജില്ലാ കോടതി സമുച്ചയ കെട്ടിടത്തിന്റെ താഴത്തെ നില കേരള അഡ്മിനിസ്ട്രേറ്റീവ് ട്രൈബ്യൂണലിന്റെ അധിക ബെഞ്ച് പ്രവർത്തനത്തിന് വിനിയോഗിക്കാന് മന്ത്രിസഭ അനുമതി നല്കി.
ഇതിനായി 22 തസ്തികകളില് 16 തസ്തികകള് പുതിയതായി സൃഷ്ടിക്കാനും 6 തസ്തികകള് പുനർ വിന്യസിക്കാനും തീരുമാനിച്ചു.
കെട്ടിടത്തിന്റെ സിവില് / ഇലക്ട്രിക് ജോലികള്ക്കായി 87,30,000 രൂപയും ഓഫീസ് സംവിധാനത്തിനായി ഒരു കോടി എട്ട് ലക്ഷത്തി തൊണ്ണൂറ്റി അയ്യായിരം രൂപയും ചെലവഴിക്കും.
ഓണറേറിയം/ ദിവസ വേതനക്കാരെ പാർട്ട് ടൈം കണ്ടിൻജൻ്റ് ജീവനക്കാരായി സ്ഥിരപ്പെടുത്തും
സംസ്ഥാനത്തെ ഗ്രാമപഞ്ചായത്തുകളിലെയും നഗരസഭകളിലെയും സാംസ്കാരിക നിലയങ്ങളിലും പഞ്ചായത്ത് ലൈബ്രറികളിലും ശിശു മന്ദിരങ്ങളിലും നഴ്സറി സ്കൂളുകളിലും ഓണറേറിയം/ ദിവസ വേതന അടിസ്ഥാനത്തില് പ്രവര്ത്തിച്ചു വരുന്ന നടപടി ക്രമങ്ങള് പാലിച്ച് നിയമനം ലഭിച്ചവരെ സ്ഥിരപ്പെടുത്തും.
പതിനൊന്നിന് പരിപാടിയുടെ ഭാഗമായോ അല്ലാതെയോ നിയമനം ലഭിച്ചവരും നിലവില് പത്തോ അതിലധികമോ വർഷമായി തുടർച്ചയായി പ്രവർത്തിച്ചു വരുന്നരെയാണ് സ്ഥിരപ്പെടുത്തുക.
ലൈബ്രേറിയന്, നഴ്സറി ടീച്ചര്, ആയ എന്നീ വിഭാഗങ്ങളില്പ്പെട്ടവരെ പാർട്ട് ടൈം കണ്ടിൻജൻ്റ് ജീവനക്കാരായി സ്ഥിരപ്പെടുത്തും. എംപ്ലോയ്മെന്റ് എക്സ്ചേഞ്ച് വഴി പാർട്ട് ടൈം ആയി നിയോഗിച്ച് ഓണറേറിയം/ദിവസ വേതന രീതിയിലേക്ക് മാറ്റിയവർ ഉള്പ്പെടെയുള്ളവര്ക്കും ആനുകൂല്യം ലഭിക്കും.
വിരമിക്കല് പ്രായം ഏകീകരിച്ചു
രണ്ട് തരത്തിലുള്ള വിരമിക്കല് പ്രായം നിലനില്ക്കുന്ന കേരളേ അഗ്രോ മിഷനറി കോര്പ്പറേഷന് ലിമിറ്റഡിലെ (KAMCO) ജീവനക്കാരുടെ വിരമിക്കല് പ്രായം 60 വയസ്സായി ഏകീകരിച്ചു. മൃഗസംരക്ഷണ വകുപ്പിൻ്റെ കീഴിലെ പൊതുമേഖലാ സ്ഥാപനമായ കേരള ലൈവ് സ്റ്റോക്ക് ഡെവലപ്മെൻ്റ് ബോർഡ് ലിമിറ്റഡിലെ ജീവനക്കാരുടെ വിരമിക്കല് പ്രായം 60 വയസ്സാക്കി ഉയർത്തി.
