തലശ്ശേരി:തലശ്ശേരി നഗരത്തിലെ പൈതൃക കേന്ദ്രങ്ങളെ ഉൾപ്പെടുത്തി 'ക്ലീൻ ഗ്രീൻ ബ്യൂട്ടിഫുൾ തലശ്ശേരി' എന്ന ശുചീകരണ-ഹരിത പ്രവർത്തനം ആഗസ്റ്റ് 15ന് ആരംഭിക്കും. 'എല്ലാവരും ചേർന്ന് ശുചിത്വവും ഹരിതവും നിറഞ്ഞ തലശ്ശേരി' എന്നതാണ് പദ്ധതിയുടെ മുദ്രാവാക്യം.
തലശ്ശേരി സബ് കലക്ടർ കാർത്തിക് പാണിഗ്രഹിയുടെ നേതൃത്വത്തിൽ നടക്കുന്ന പരിപാടിയുടെ ഉദ്ഘാടനം രാവിലെ പത്ത് മണിക്ക് കോടതി പരിസരത്ത് ജില്ലാ ജഡ്ജി അഹമ്മദ് നിസാർ നിർവഹിക്കും. തലശ്ശേരി മുനിസിപ്പൽ ചെയർപേഴ്സൺ കെ.എം ജമുണറാണി ടീച്ചർ പങ്കെടുക്കും.
തുടർന്ന് നഗരത്തിലെ വിവിധ പൈതൃക കേന്ദ്രങ്ങൾ, പൊതുസ്ഥലങ്ങൾ, പാർക്കുകൾ, റോഡുകൾ, തീരപ്രദേശങ്ങൾ എന്നിവിടങ്ങളിൽ ശുചീകരണ പ്രവർത്തനങ്ങൾ സംഘടിപ്പിക്കും. ശുചിത്വവും പരിസ്ഥിതി സംരക്ഷണവും ഉറപ്പാക്കുന്നതോടൊപ്പം നഗരത്തിന്റെ സാംസ്‌കാരിക-ചരിത്ര പൈതൃകം സംരക്ഷിച്ച് വരുംതലമുറകൾക്ക് കൈമാറുക എന്നതാണ് പദ്ധതിയുടെ ലക്ഷ്യം.
തലശ്ശേരിയിലെ സ്‌കൂളുകൾ, കോളേജുകൾ, ക്ലബ്ബുകൾ, സാമൂഹിക-സാംസ്‌കാരിക സംഘടനകൾ, വ്യാപാര സ്ഥാപനങ്ങൾ എന്നിവ ക്ലീൻ ഗ്രീൻ ബ്യൂട്ടിഫുൾ തലശ്ശേരിയുടെ ഭാഗമാകും. ഓരോ മാസവും നഗരത്തിലെ വ്യത്യസ്ത പ്രദേശങ്ങളിൽ ശുചീകരണ ക്യാമ്പുകൾ സംഘടിപ്പിക്കും. കൂടാതെ പൊതുജന പങ്കാളിത്തം ഉറപ്പാക്കുന്ന വിവിധ പ്രവർത്തനങ്ങളും നടത്തും. നഗരത്തിന്റെ ഭംഗിയും പൈതൃക മൂല്യവും സംരക്ഷിക്കാൻ സർക്കാർ സംവിധാനങ്ങളും പൊതുജനങ്ങളും കൈകോർക്കണമെന്ന് സബ് കലക്ടർ പറഞ്ഞു.
