തലശ്ശേരി ദേശീയ പാതയിൽ പാലിശ്ശേരിയിലെ എ.എസ്.പി. ഓഫീസിനടുത്ത് ആൾപാർപ്പില്ലാത്ത വീടിന്റെ മേൽക്കൂര തകർന്ന് വീണ് ഒരാൾക്ക് പരിക്ക്.
ഇന്ന് രാവിലെ ഉണ്ടായ കനത്ത മഴയിലാണ് സംഭവം.
കർക്കിട സംക്രമമായതിനാൽ ആൾ താമസമില്ലാത്ത തറവാട്ട് വീട്ടിലെ ശാസ്തപ്പൻ ദേവസ്ഥാനത്ത് രാവിലെ വിളക്ക് കത്തിക്കാൻ എത്തിയ അയൽവാസിയായ രാജീവൻ (56) എന്നയാൾക്കാണ് പരിക്കേറ്റത്. പുറത്ത് പരിക്കേറ്റ രാജീവൻ സഹകരണാശുപത്രിയിൽ ചികിത്സയിലാണ്.
ഇവിടെ ആൾതാമസമില്ലായിരുന്നു. ജ്ഞാനോദയ യോഗം പ്രസിഡണ്ടായിരുന്ന പരേതനായ കെ.പി. രത്നാകരന്റെ തറവാട് വീടായ പുതുവോത്ത് വീട്ടിന്റെ മേൽക്കൂരയാണ് തകർന്ന് വീണത്. ഈ വീടിന് വർഷങ്ങൾ പഴക്കമുണ്ട്.
