കോഴിക്കോട്: അഭിഭാഷകനായ ബി.എ. ആളൂരിന്റെ അപ്രതീക്ഷിത മരണത്തെത്തുടർന്ന് നിർത്തി വെച്ച കൂടത്തായി റോയ് തോമസ് വധക്കേസ് വിചാരണ പുനരാരംഭിച്ചു.
കേസിലെ ഒന്നാം പ്രതിയായ ജോളിക്കു വേണ്ടി ആളൂരിനു പകരം അഡ്വ.കെ.പി. പ്രശാന്ത് വക്കാലത്ത് നല്‍കിയതിനെത്തുടർന്നാണ് വിചാരണ നടപടികള്‍ മാറാട് പ്രത്യേക കോടതി ജഡ്ജി കെ. സുരേഷ് കുമാർ മുൻപാകെ പുനഃരാരംഭിച്ചത്.
കേസിലെ 192-ാം സാക്ഷി സൈബർ സെല്ലിലെ പോലീസുദ്യോഗസ്ഥൻ എം.കെ. ഷരേഷിനെ തിങ്കളാഴ്ച വിസ്തരിച്ചു. രണ്ടാം പ്രതിക്കു വേണ്ടി അഡ്വ. എം. ഷഹീർ സിങ് എതിർ വിസ്താരം നടത്തി.
പ്രോസിക്യൂഷനു വേണ്ടി സ്പെഷ്യല്‍ പ്രോസിക്യൂട്ടർ എൻ.കെ. ഉണ്ണികൃഷ്ണൻ അഡീഷണല്‍ സ്പെഷ്യല്‍ പ്രോസിക്യൂട്ടർ ഇ. സുഭാഷ് എന്നിവർ ഹാജരായി. വിചാരണ 28-ന് തുടരും.
