കോഴിക്കോട്: അമിത വേഗത്തിലെത്തിയ സ്വകാര്യ ബസിടിച്ച്‌ ബൈക്ക് യാത്രികനായ വിദ്യാർഥിക്ക് ദാരുണാന്ത്യം. മുളിയങ്ങല്‍ ചെക്യലത്ത് റസാക്കിന്റെ മകന്‍ ഷാദില്‍ ആണ് മരിച്ചത്.
പേരാമ്പ്രയില്‍ ഇന്ന് ഉച്ചയ്ക്ക് 2 മണിയോടെയായിരുന്നു അപകടം. കോഴിക്കോട് നിന്ന് കുറ്റ്യാടി വഴി നാദാപുരത്തേക്കു പോകുകയായിരുന്ന ബസാണ് വിദ്യാർഥി സഞ്ചരിച്ച ബൈക്കില്‍ ഇടിച്ചത്.
പേരാമ്പ്ര സെന്റ് ഫ്രാന്‍സിസ് പള്ളിക്ക് സമീപത്തുവെച്ചാണ് ഷാദില്‍ സഞ്ചരിച്ച ബൈക്കിനു പിന്നില്‍ ബസ് ഇടിച്ചത്. ബസ് അമിത വേഗതയില്‍ ആയിരുന്നുവെന്നു ദൃക്‌സാക്ഷികള്‍ പറഞ്ഞു.
പേരാമ്പ്ര ഡിഗ്നിറ്റി കോളജില്‍ രണ്ടാം വര്‍ഷ ഡിഗ്രി വിദ്യാര്‍ഥിയാണ് ഷാദില്‍. പരീക്ഷ കഴിഞ്ഞ് വീട്ടിലേക്കു മടങ്ങും വഴിയായിരുന്നു അപകടം.
ഇടിച്ച ശേഷം 10 മീറ്ററോളം ബൈക്കിനെ വലിച്ചിഴച്ച ശേഷമാണ് ബസ് നിന്നതെന്നും അപകടം കണ്ട ദൃക്‌സാക്ഷികള്‍ പറഞ്ഞു.
