പയ്യോളി: ബസില്‍ കയറുന്നതിനിടെ താഴെ വീണ് വിദ്യാര്‍ഥിക്ക് പരിക്ക്. കോഴിക്കോട് ജെ.ഡി.ടിയിലെ രണ്ടാം വര്‍ഷ ഇലക്‌ട്രോണിക്സ് വിദ്യാര്‍ഥിയും പയ്യോളി ആവിത്താരേമ്മല്‍ "മിന്‍ഹാസില്‍' നവാസിന്‍റെ മകനുമായ മുഹമ്മദ് മുബാഷി (19) നാണ് പരിക്കേറ്റത്.
ഇക്കഴിഞ്ഞ വെള്ളിയാഴ്ച രാവിലെ എട്ട് മണിയോടെയാണ് സംഭവം. കോഴിക്കോട് ഭാഗത്തേക്കുള്ള ബസുകള്‍ പലപ്പോഴും സ്റ്റാൻഡില്‍ കയറ്റാതെ കിഴക്ക് ഭാഗത്തെ സര്‍വീസ് റോഡില്‍ നിര്‍ത്തി ആളെ എടുക്കുകയാണ് പതിവ്.
ഇത്തരത്തില്‍ റോഡരികില്‍ നിന്ന് ബസില്‍ ആളുകള്‍ കയറിയ ശേഷം വിദ്യാര്‍ഥികളെ കയറ്റുന്ന ബസുകാര്‍ വിദ്യാര്‍ഥികളെ പുറത്തു നിര്‍ത്തി വേഗത്തില്‍ എടുത്ത് പോകുന്നതും പതിവാണ്.
ഇത്തരത്തില്‍ കയറാന്‍ ശ്രമിക്കുന്നതിനിടെ മുബാഷ് ബസില്‍ കയറിയ ഉടനെ ഓട്ടോമാറ്റിക് ഡോര്‍ അടച്ചു പോവുകയും വിദ്യാർഥി താഴേക്കു തെറിച്ചു വീഴുകയുമായിരുന്നു.
കൊയിലാണ്ടി താലൂക്ക് ആശുപത്രിയില്‍ ചികിത്സ തേടിയ വിദ്യാര്‍ഥി ഇപ്പോള്‍ പ്ലാസ്റ്ററിട്ട് വീട്ടില്‍ കിടപ്പിലാണ്. വിദ്യാര്‍ഥിയുടെ പരാതിയില്‍ കെഎല്‍ 58 എജെ 8289 നമ്പർ സ്വകാര്യ ബസിന്‍റെ ഡ്രൈവര്‍ക്കെതിരേ പയ്യോളി പോലീസ് കേസെടുത്തിട്ടുണ്ട്.
മാസങ്ങള്‍ക്ക് മുമ്പ് സമാന സംഭവത്തില്‍ പയ്യോളി ബസ് സ്റ്റാന്‍ഡില്‍ നിന്ന് ഓട്ടോമാറ്റിക് ഡോര്‍ അടച്ചതിനെ തുടര്‍ന്നു താഴെ വീണ അധ്യാപകനായ യാത്രക്കാരന്‍റെ കാല് മുറിച്ച്‌ മാറ്റേണ്ടി വന്നിട്ടുണ്ട്.
ബസുകളുടെ മത്സരയോട്ടമാണ് പലപ്പോഴും ഇത്തരത്തിലെ സംഭവങ്ങള്‍ക്ക് കാരണമാകുന്നത്. പയ്യോളി ബസ് സ്റ്റാൻഡില്‍ ട്രാഫിക് പോലീസിനെ നിയമിക്കണമെന്നാവശ്യം ഇതുവരെയും പരിഗണിക്കപ്പെട്ടിട്ടില്ല.
