തലശ്ശേരി: കാറിൽ കടത്തുകയായിരുന്ന 4.19 ഗ്രാം എം.ഡി.എം.എയുമായി മൂന്ന് യുവാക്കളെ പോലീസ് അറസ്റ്റ് ചെയ്തു. ലഹരിവിരുദ്ധ നടപടിയായ 'ഓപ്പറേഷൻ തൂഫാന്റെ' ഭാഗമായി തലശ്ശേരി, കണ്ണൂർ ഡാൻസാഫ് ടീമും തലശ്ശേരി പോലീസും സംയുക്തമായി നടത്തിയ വാഹന പരിശോധനയിലാണ് ഇവർ പിടിയിലായത്.
കൊളശ്ശേരി അണ്ടർപാസിന് സമീപത്ത് വെച്ച് അമിതവേഗതയിൽ എത്തിയ കാർ തടഞ്ഞുനിർത്തി പരിശോധിച്ചപ്പോഴാണ് ലഹരിമരുന്ന് കണ്ടെത്തിയത്. ലഹരിവസ്തുക്കളും കടത്താൻ ഉപയോഗിച്ച കാറും പോലീസ് കസ്റ്റഡിയിലെടുത്തു.
ചമ്പാട് പുതുക്കുടി മനയത്ത് വയലിൽ ഷദാബ് റോഷൻ (31), പന്ന്യന്നൂർ ആണ്ടിപ്പീടികയിലെ റഫ്നാസ് (29), പുന്നോൽ മുസ്താഫി (31) എന്നിവരാണ് അറസ്റ്റിലായത്.
