വടകര: വടകര ലഹരി കേസില് വയനാട് സ്വദേശിയെ കേന്ദ്രീകരിച്ച് അന്വേഷണം വ്യാപിപ്പിച്ച് അന്വേഷണ സംഘം. കേസിലെ മുഖ്യകണ്ണി വയനാട് സ്വദേശിയാണെന്നാണ് സൂചന.
ഇയാളെ ഉടന് തന്നെ കസ്റ്റഡിയില് എടുത്ത് ചോദ്യം ചെയ്യാനാണ് നീക്കം. ഇന്നലെ അറസ്റ്റിലായ ജിജില് കുര്യാക്കോസില് നിന്നാണ് നിര്ണായക വിവരങ്ങള് അന്വേഷണ സംഘത്തിന് ലഭിച്ചത്. ഒരു കോടിയോളം രൂപയുടെ ഇടപാടാണ് ഇയാളുടെ അക്കൗണ്ടിലൂടെ നടന്നിരിക്കുന്നത്.
അതേസമയം, കേസില് അറസ്റ്റിലായ മൂന്ന് അധ്യാപകർ ലഹരി പാർട്ടികള് നടത്തിയെന്ന് അന്വേഷണ സംഘത്തിന്റെ കണ്ടെത്തല്. പിടിയിലായ കീർത്തനയുടെയും കാവ്യയുടെയും അക്കൗണ്ടില് 6 മാസത്തിനിടയില് എത്തിയത് ലക്ഷങ്ങളാണ്.
ചോദ്യം ചെയ്യലില് ലഹരിയുടെ മൊത്ത വിതരണക്കാരുടെ വിവരങ്ങള് പറയാൻ പ്രതികള് തയ്യാറായില്ല. ലഹരി വ്യാപാര ശൃംഖലയില് മിഡില് ഏജന്റുമാരാണ് ഇവർ.
എല്ലാം നീഷ്മയ്ക്ക് അറിയാമെന്ന് കീർത്തന മൊഴി നല്കി. റേഞ്ച് DIG കെ കാർത്തിക് ഇന്ന് വടകരയില് അന്വേഷണ സംഘത്തിന്റെ യോഗത്തില് പങ്കെടുക്കും.
10 ലക്ഷത്തിലേറെ പണം കഴിഞ്ഞ 6 മാസത്തിനകം മൂന്ന് പ്രതികളുടെയും അക്കൗണ്ടില് നേരിട്ട് എത്തിയതായി പൊലീസ് കണ്ടെത്തി. ലഹരി മാഫിയയിലെ കണ്ണികളുമായി ബന്ധപ്പെട്ടത് ഇൻസ്റ്റഗ്രാം വഴിയെന്നാണ് പൊലീസിന്റെ കണ്ടെത്തല്.
