തലശ്ശേരി: സംസ്ഥാനതല പ്രവേശന പരീക്ഷകളിൽ ഉജ്ജ്വല വിജയം കൈവരിച്ച പൂർവ്വവിദ്യാർത്ഥികളെ ആദരിച്ച് മുബാറക്ക ഹയർ സെക്കൻഡറി സ്കൂൾ മാനേജ്മെന്റ് കമ്മിറ്റി സംഘടിപ്പിച്ച "മികവുത്സവം" ശ്രദ്ധേയമായി. കേരള എഞ്ചിനിയറിംഗ് പ്രവേശന പരീക്ഷയിൽ സംസ്ഥാന ഏഴാം റാങ്ക് നേടിയ തലാൽ ഷിഹാബുദ്ദീൻ, ഫാർമസി പ്രവേശന പരീക്ഷയിൽ സംസ്ഥാന പതിനൊന്നാം റാങ്ക് നേടിയ ഹൈഫ നൗഫൽ പൂർവ്വ വിദ്യാർത്ഥികളെയാണ് ചടങ്ങിൽ അനുമോദിച്ചത്.
സ്കൂൾ ഓഡിറ്റോറിയത്തിൽ നടന്ന ചടങ്ങിൽ ഡോ. എം. നന്ദഗോപൻ ഐ.പി.എസ് ഉദ്ഘാടനം നിർവഹിച്ചു. കഠിനാധ്വാനവും ലക്ഷ്യബോധവും വിജയത്തിലേക്കുള്ള പ്രധാന വഴികളാണെന്നും വിദ്യാർത്ഥികളുടെ നേട്ടം വിദ്യാലയത്തിനും സമൂഹത്തിനും അഭിമാനകരമാണെന്നും അദ്ദേഹം പറഞ്ഞു.
സ്കൂൾ മാനേജ്മെന്റ് കമ്മിറ്റി പ്രസിഡന്റ് എ. കെ. സക്കരിയ അധ്യക്ഷത വഹിച്ചു. മാനേജർ സി. ഹാരിസ് ഹാജി വിജയികൾക്ക് പൊന്നാട അണിയിച്ച് ഉപഹാരങ്ങൾ നൽകി ആദരിച്ചു. വിദ്യാർത്ഥികളുടെ മികവിന് പിന്നിൽ പ്രവർത്തിച്ച അധ്യാപകരെയും രക്ഷിതാക്കളെയും ചടങ്ങിൽ പ്രത്യേകം അഭിനന്ദിച്ചു.
മാനേജ്മെൻ്റ് കമ്മിറ്റി സെക്രട്ടറി ചെറിയാണ്ടി ബഷീർ മാസ്റ്റർ സ്വാഗതം പറഞ്ഞു. പ്രിൻസിപ്പൽ ടി. എം. മുഹമ്മദ് സാജിദ്, പ്രഥമാധ്യാപകൻ എം. കെ. കുഞ്ഞിമൊയ്തു, പ്രൊഫ. എ. പി. സുബൈർ, സി. എ. അബൂബക്കർ, പി.ടി.എ പ്രസിഡന്റ് തഫ്ലിം മാണിയാട്ട്, സ്റ്റാഫ് സെക്രട്ടറി എൻ. എം. നിഷാദ്, എ. എൻ. പി. ഷാഹിദ് എന്നിവർ ആശംസകൾ നേർന്ന് സംസാരിച്ചു.
സംസ്ഥാനതല റാങ്ക് നേട്ടങ്ങളിലൂടെ മുബാറക്ക ഹയർ സെക്കൻഡറി സ്കൂളിന്റെ അക്കാദമിക മികവ് ഒരിക്കൽക്കൂടി തെളിയിക്കപ്പെട്ടതായി ചടങ്ങിൽ പങ്കെടുത്തവർ അഭിപ്രായപ്പെട്ടു.
