Kuthuparamba

കൂത്തുപറമ്പ്:മഴക്കാലപൂർവ ശുചീകരണത്തിന്റെ ഭാഗമായി കൂത്തുപറമ്പ് നഗരപരിധിയിൽ മേയ് 19-നു ഉച്ചവരെ ശുചിത്വ ഹർത്താൽ ആചരിക്കാൻ തീരുമാനിച്ചു. വ്യാപാര സംഘടനാപ്രതിനിധികളുടെയും ഹോട്ടൽ ആൻഡ് റ‌സ്റ്റോറൻ്റ് ഉടമകളുടെയും യോഗത്തിലാണ് ശുചിത്വ ഹർത്താൽ വിജയിപ്പിക്കാൻ തീരുമാനിച്ചത്. ഇത് നഗരത്തിന്റെ ശുചിത്വം നിലനിർത്താൻ, വിവിധ ആരോഗ്യപ്രശ്നങ്ങൾ ഒഴിവാക്കാൻ, പൊതു ആരോഗ്യത്തിനു ഗുണകരമാകും. ഹർത്താലിൽ രാവിലെ 7.30 മുതൽ വ്യാപാര സ്ഥാപനങ്ങൾ അടച്ചിട്ട് പൊതുജനങ്ങൾ ശുചിത്വ പ്രവർത്തനങ്ങളിൽ പങ്കുചേരും. ഹരിത കർമസേനയും സന്നദ്ധ സംഘടനകളും പങ്കാളികളാകും.

മഴക്കാലത്തിനുമുമ്പ് ഹോട്ടലുകളിൽനിന്ന് മലിനജല ഒഴുക്കൽ തടയാൻ കർശനനടപടി എടുക്കും സോക്‌പിറ്റ് ഇല്ലാത്ത ഹോട്ടലുകളുടെ ലൈസൻസ് റദ്ദ് ചെയ്യും

യോഗത്തിൽ നഗരസഭാ ചെയർമാൻ വി.സുജാത അധ്യക്ഷയായി. സെക്രട്ടറി കെ ആർ അജി, കെ അജിത, അബ്ദുൾസത്താർ, ഹെൽത്ത് ഇൻസ്പെക്ടർ കെ ബാബു എന്നിവർ സംസാരിച്ചു.

പിണറായി: ജീവിതത്തിൽ ഒറ്റപ്പെട്ടുപോയ സ്ത്രീകൾക്ക് സുരക്ഷയൊരുക്കുന്ന പദ്ധതി “തനിച്ചല്ല ഒപ്പമുണ്ട് ” പിണറായി പൊലീസ് സ്റ്റേഷൻ പരിധിയിൽ തുടക്കമായി. പിണറായി കൺവെൻഷൻ സെന്ററിൽ കണ്ണൂർ സിറ്റി പൊലീസ് കമ്മീഷണർ അജിത് കുമാർ ഉദ്ഘാടനം ചെയ്തു. തലശ്ശേരി എ എസ് പി ഷഹൻഷ അധ്യക്ഷനായി. സിനിമാ താരം സാജു കൊടിയൻ മുഖ്യാതിഥിയായി. കണ്ണൂർ സിറ്റി അഡീഷ്ണൽ എസ് പി ബാലകൃഷ്ണൻ നായർ, ഹിതൈഷിണി ബിനീഷ് എന്നിവർ വിഷിഷ്ടാതിഥികളായി. പിണറായി പൊലീസ് സ്റ്റേഷൻ ഹൗസ് ഓഫീസർ എം വി വിഷ്ണു പ്രസാദ്, കെ രാജേഷ്, വി സിനീഷ്, ഇ കെ വിനോദ് ,എ.കെ ഷിജു എന്നിവർ സംസാരിച്ചു.തുടർന്ന് വടകരയിലെ ലിധിലാലും സംഘവും ജാനു തമാശകൾ അവതരിപ്പിച്ചു. “മനസ്സ് അറിയേണ്ടതെല്ലാം എന്ന വിഷയത്തിൽ ഡോ. ജിൻസി ജോഷി ക്ലാസ്സെടുത്തു. വനിതകളുടെ കലാപരിപാടികൾക്ക്‌ ശേഷം വൈകിട്ട് നാലിന് ഇവരുമായി മുഴപ്പിലങ്ങാട് ബീച്ചിലേക്ക് സ്നേഹ യാത്രയും നടത്തി.

ഇരിട്ടി :കൂട്ടുപുഴ പുതിയ പാലത്തിന്സമീപം പുഴയിൽ 15 കാരിയെ മരിച്ച നിലയിൽ കണ്ടെത്തി. കഴിഞ്ഞ ദിവസം കോളിത്തട്ടിൽ നിന്ന് കാണാതായ ദുർഗ്ഗ (15) ആണ് മരിച്ച നിലയിൽ കണ്ടെത്തിയത്. പോലീസും ഫയർഫോഴ്സും സ്ഥലത്തെത്തി.

കൂത്തുപറമ്പ്:നിർമലഗിരി കോളേജിൽ ഗസ് റ്റ് ലക്‌ചററെ നിയമിക്കുന്നു. 9ന് രാവിലെ 9.30ന് മാത്തമാറ്റിക്സ്, ഫിസിക്സ്, സുവോളജി, 1.30 ന് മലയാളം, ഹിസ്റ്ററി, പൊളി റ്റിക്കൽ സയൻസ്, 10ന് രാവി ലെ 9.30ന് ഇംഗ്ലീഷ്, ബോട്ടണി, കെമിസ്ട്രി, സ്റ്റാറ്റിസ്റ്റിക് സ്, 1.30ന് കൊമേഴ്സ്, ഹിന്ദി, ഹോം സയൻസ് ഇന്റർവ്യൂ നടക്കും.

അപേക്ഷകർ കോഴിക്കോട് മേഖലാ ഡെപ്യൂട്ടി ഡയറക്ടറേറ്റിൽ ഗസ്റ്റ് അധ്യാപക പാനലിൽ രജിസ്റ്റർ ചെയ്തവരായിരി ക്കണം.

പുന്നോൽ : വിദ്യാഭ്യാസ, സാമൂഹ്യ, സേവന രംഗങ്ങളിൽ മാതൃകയായി പ്രവർത്തിച്ചു വരുന്ന പുന്നോൽ തണൽ ഫൌണ്ടേഷന്റെയും അനുബന്ധ സ്ഥാപനങ്ങളുടെയും സ്ഥാപക മെമ്പർ ആയ ടി എം മമ്മൂട്ടിയുടെ സ്മരണക്കായി പുന്നോൽ തണൽ ഫൌണ്ടേഷൻ വർഷം തോറും നൽകിവരുന്ന മികച്ച സാമൂഹ്യ പ്രവർത്തകനുള്ള ഈ വർഷത്തെ പുരസ്കാരം സുനിൽ മാങ്ങാട്ടിടത്തിന്.
പെയിൻ ആൻഡ് പാലിയേറ്റീവ് രംഗത്ത് ശ്രദ്ധേയമായ പ്രവർത്തനം മുൻനിർത്തിയാണ് പുരസ്കാരം ‘
ഇന്ത്യൻ അസോസിയേഷൻ ഓഫ് പാലിയേറ്റീവ് കെയർ സംസ്ഥാന സെക്രട്ടറിയും പാലിയേറ്റീവ് ഇനീഷ്യ റ്റ്റീവ് കെയർ കണ്ണൂർ ചെയർമാനുമായ സുനിൽ മാങ്ങാട്ടിടം മികച്ച പാലിയേറ്റീവ് ട്രെയിനറും പാലിയേറ്റിവ് സംഘാടകനും വളണ്ടിയറും ആണ്. പതിനായിരം രൂപയും ശില്പവും അടങ്ങിയ അവാർഡ് മെയ്‌ ഒന്നിന് വൈകുന്നേരം 4.30 ന് പുന്നോൽ തണൽ ഓഡിറ്റോറിയത്തിൽ ജില്ലാ ജഡ്ജ് വി പി എം സുരേഷ് ബാബു സുനിൽ മാങ്ങാട്ടിടത്തിനു സമ്മാനിക്കും. മലബാർ കാൻസർ സെന്റർ സർജിക്കൽ ഓങ്കോളജി ഡിപ്പാർട്മെന്റ് തലവനും അഡീഷണൽ പ്രൊഫസറും ആയ ഡോക്ടർ എം പി നിസാമുദ്ദീൻ, അഭയ ഫൌണ്ടേഷൻ സെക്രട്ടറി എ പി അജ്മൽ, തുടങ്ങിയവർ സംബന്ധിക്കും. തണൽ ചെയർമാൻ പിഎം അബ്ദുൽ നാസിർ അധ്യക്ഷത വഹിക്കും.

കൂത്തുപറമ്പ് : നിരവധി കേസുകളില്‍ പ്രതികളായ മൂന്ന് ആർ.എസ്.എസ് പ്രവർത്തകരെ കാപ്പ ചുമത്തി നാടുകടത്തി. ചൂണ്ടയിലെ പള്ളിയത്ത് ഞാലില്‍ ഹൗസില്‍ അമല്‍ രാജ് (28), ചൂണ്ടയിലെ പി.കെ. നിവാസില്‍ റിഷില്‍ (28), തൊടീക്കളത്തെ നടുക്കണ്ടി ഹൗസില്‍ മിഥുൻ (28) എന്നിവർക്കെതിരെയാണ് കേരള സാമൂഹിക വിരുദ്ധ പ്രവർത്തനങ്ങള്‍ തടയല്‍ നിയമം (കാപ്പ) ചുമത്തിയത്. കണ്ണൂർ സിറ്റി പൊലീസ് കമീഷണർ അജിത് കുമാറിന്റെ റിപ്പോർട്ടിന്റെ അടിസ്ഥാനത്തില്‍ ജില്ല കലക്ടറുടെ ഉത്തരവ് പ്രകാരമാണ് നടപടി.

കണ്ണവത്തെ എസ്.ഡി.പി.ഐ പ്രവർത്തകൻ സയ്യിദ് സലാഹുദ്ദീൻ വധം ഉള്‍പ്പെടെ നിരവധി ക്രിമിനല്‍ കേസുകളിലെ പ്രതികളാണ് മൂന്നുപേരും.

കൂത്തുപറമ്പ് : കനറാ ബാങ്ക് മമ്പറം ശാഖ കൂടുതല്‍ സൗകര്യങ്ങളോടെ, കൂത്തുപറമ്പ് റോഡില്‍ തൂകുച് ടവറില്‍ പ്രവര്‍ത്തനമാരംഭിച്ചു. ബാങ്കിന്‍റെ കണ്ണൂര്‍ റീജ്യണല്‍ മേധാവി ലത പി കുറുപ്പ് ഉദ്ഘാടനം നിര്‍വഹിച്ചു. ഡിവിഷണല്‍ മാനേജര്‍ പി കെ അനില്‍ കുമാര്‍ യോഗത്തില്‍ അദ്ധ്യക്ഷനായി. മമ്പറം ദിവാകരന്‍, ആര്‍ മതിവനന്‍, എം ദിനേശന്‍, കെ ജയരാജന്‍ എന്നിവര്‍ ആശംസകള്‍ നേര്‍ന്നു. അരുണ്‍ കെ പി സ്വാഗതവും താരക് രഖേഷ് നന്ദിയും പറഞ്ഞു.

കേളകം – അടക്കാത്തോട് റോഡ് പ്രവൃത്തി നടക്കുന്നതിനാല്‍ കേളകത്തുനിന്നും അടക്കാത്തോട് വരെയുള്ള വാഹനഗതാഗതം ഏപ്രില്‍ 17 മുതല്‍ 24 വരെ പൂര്‍ണമായും നിരോധിച്ചു.

കേളകത്തുനിന്നും അടക്കാത്തോട് ഭാഗത്തേക്ക് പോകേണ്ടവര്‍ കണിച്ചാര്‍ – കുണ്ടേരി ആനക്കുഴി വഴിയും
ഇരട്ടത്തോട് – ശാന്തിഗിരി – പാറത്തോട് വഴിയും പോകേണ്ടതാണെന്ന് തലശ്ശേരി പൊതുമരാമത്ത് നിരത്തുകള്‍ ഉപവിഭാഗം അസി.എക്‌സിക്യൂട്ടീവ് എഞ്ചിനീയര്‍ അറിയിച്ചു

കണ്ണവം:കണ്ണവത്ത് സ്റ്റീൽ ബോംബ് കണ്ടെത്തി. കണ്ണവം ചുണ്ടയിലാണ് സംഭവം. കലുങ്കിന് സമീപത്തു നിന്നുമാണ് സ്റ്റീൽ ബോംബ് കണ്ടത്. കണ്ണവം എസ് ഐ രാജീവൻ്റെ നേതൃത്വത്തിൽ നടത്തിയ പരിശോധനയിലാണ് ബോംബ് കണ്ടെത്തിയത്.

തിരഞ്ഞെടുപ്പിന്റെ ഭാഗമായി നടക്കുന്ന പതിവ് പരിശോധനയുടെ ഭാഗമായാണ് ഒളിപ്പിച്ച നിലയിൽ സ്റ്റീൽ ബോംബ് കണ്ടെത്തിയത്. തിരഞ്ഞെടുപ്പ് കാലത്ത് മുൻ കാലങ്ങളിലെ രാഷ്ട്രീയ സംഘർഷങ്ങളെ തുടർന്നാണ് പോലീസ് പതിവ് പരിശോധനകൾ നടത്തുന്നുണ്ട്. മേഖലയിൽ സമാനമായ രീതിയിൽ സ്റ്റീൽ ബോംബുകൾ ഒളിപ്പിച്ചു വെച്ച സംഭവങ്ങൾ നേരത്തെ ഉണ്ടായിരുന്നു. ഇത് കൂടെ കണക്കിലെടുത്താണ് പരിശോധന നടത്തുന്നത്. ഉപേക്ഷിച്ച നിലയിൽ അല്ല ഒളിപ്പിച്ച നിലയിൽ ആണ് ബോംബ് കണ്ടെത്തിയിട്ടുള്ളത്. ഉറവിടം കണ്ടെത്തുന്നതിനായി പോലീസ് അന്വേഷണം ആരംഭിച്ചിട്ടുണ്ട്. മേഖലയിലെ മറ്റിടങ്ങളും തിരച്ചിൽ ശക്തമാക്കിയിട്ടുണ്ട് .ബോംബ് സ്‌ക്വാഡെത്തി ബോംബ് നിർവീര്യമാക്കി.

അഞ്ചരക്കണ്ടി-മട്ടന്നൂര്‍ റോഡില്‍ കാര മുത്തപ്പന്‍ ക്ഷേത്രത്തിനടുത്ത് കുടിവെള്ള പൈപ്പ് ലൈനില്‍ അറ്റകുറ്റ പ്രവൃത്തി നടക്കുന്നതിനാല്‍ ഏപ്രില്‍ നാല്, അഞ്ച് തീയ്യതികളില്‍ അഞ്ചരക്കണ്ടി, പെരളശ്ശേരി കുടിവെള്ള പദ്ധതിയുടെ പരിധിയിലെ പെരളശ്ശേരി, കടമ്പൂര്‍, മുഴപ്പിലങ്ങാട്, ചെമ്പിലോട്, പിണറായി, അഞ്ചരക്കണ്ടി, വേങ്ങാട്, എരഞ്ഞോളി, കതിരൂര്‍ എന്നീ പഞ്ചായത്തുകളിലും കണ്ണൂര്‍ കോര്‍പറേഷന്‍ പരിധിയിലെ ചേലോറ ഡിവിഷനിലും കുടിവെള്ള വിതരണം മുടങ്ങുമെന്ന് അസിസ്റ്റന്റ്‌റ് എക്സിക്യൂട്ടിവ് എഞ്ചിനീയര്‍ അറിയിച്ചു.