തലശ്ശേരി: ധർമ്മടം കൂടക്കടവ് പുഴയിലെ ചരിത്രപ്രസിദ്ധമായ പഴയ റെയിൽവേ മേൽപ്പാലം പൊളിച്ചു മാറ്റിത്തുടങ്ങി. 123 വർഷത്തെ ചരിത്രപ്പഴമയുള്ള ഈ പാലത്തിന് കാലപ്പഴക്കത്താൽ ബലക്ഷയം ഉണ്ടെന്ന് റെയിൽവേ എൻജിനീയറിങ് വിഭാഗം കണ്ടെത്തിയതിനെ തുടർന്നാണ് പൊളിച്ചുമാറ്റാനുള്ള നടപടികൾ ആരംഭിച്ചത്.
കുമ്പള, ഷെറിയ, നീലേശ്വരം, കാര്യംകോട്, ബേക്കൽ, പള്ളിക്കര, പയ്യന്നൂർ, ഏഴിമല, ചെറുവത്തൂർ, പഴയങ്ങാടി, കൂടക്കടവ്, ധർമ്മടം തുടങ്ങിയ പ്രദേശങ്ങളിലെ പഴയ റെയിൽ പാലങ്ങളെ റെയിൽവേ എൻജിനീയറിങ് വിഭാഗം ബ്ലാക്ക് ലിസ്റ്റിൽ പെടുത്തി പൊളിച്ചുമാറ്റാൻ തീരുമാനിച്ചിരുന്നു. ഇവിടങ്ങളിൽ ഭൂരിഭാഗം സ്ഥലങ്ങളിലും പുതിയ പാലങ്ങളുടെ നിർമ്മാണം പൂർത്തിയായിട്ടുണ്ട്.
1901 ന് ശേഷമാണ് കോഴിക്കോട് നിന്നും വടക്കോട്ട് റെയിൽ ഗതാഗതം ആരംഭിക്കുന്നത്. 1903 മുതൽ ആയിരക്കണക്കിന് തീവണ്ടികൾ കടന്നുപോയ ചരിത്രമാണ് കൂടക്കടവ് പാലത്തിനുള്ളത്. ബ്രിട്ടീഷുകാരുടെ കാലത്ത് നിർമ്മിച്ച ഈ പാലത്തിന്റെ ഗർഡറുകളും സ്റ്റീൽ സ്ലീപ്പറുകളും ഇതിനകം പൊളിച്ചുമാറ്റി. നൂറ്റാണ്ടുകൾ കഴിഞ്ഞിട്ടും തുരുമ്പിക്കാത്ത റെയിൽ ക്ലിപ്പുകളും നട്ട് ബോൾട്ടുകളുമാണ് പാലത്തിൽ നിന്ന് ഇപ്പോഴും ലഭിക്കുന്നത്. തിരുച്ചിറപ്പള്ളിയിലെ റിയാ ഷെൽ ട്രേഡേഴ്സ് എന്ന കമ്പനിയാണ് പാലം പൊളിച്ചുമാറ്റാനുള്ള കരാർ ലേലത്തിൽ എടുത്തത്.
പഴയ തലമുറയ്ക്ക് ധർമ്മടം റെയിൽവേ സ്റ്റേഷനും കൂടക്കടവ് റെയിൽവേ പാലവും വലിയ ഗൃഹാതുരത്വമുള്ള ഓർമ്മയാണെന്ന് പ്രൊഫസർ കെ കുമാരൻ പറഞ്ഞു. കൂടക്കടവ് പാലം പൊളിച്ചുനീക്കുന്നതോടെ മലബാറിന്റെ റെയിൽവേ ചരിത്രത്തിലെ പ്രധാനപ്പെട്ട ഒരു അധ്യായമാണ് ഓർമ്മയാകുന്നത്.
