തലശ്ശേരി: ഫുട്ബോൾ പ്രേമികൾ ആവേശത്തോടെ കാത്തിരിക്കുന്ന 42-ാമത് അഖിലേന്ത്യ മാഹി സെവൻസ് ഫ്ലഡ്ലൈറ്റ് ഫുട്ബോൾ ടൂർണ്ണമെന്റിന്റെ ബ്രൗഷർ പ്രകാശനം ചെയ്തു. തലശ്ശേരി പ്രസ് ക്ലബ്ബിൽ വെച്ച് നടന്ന ചടങ്ങിൽ നഗരസഭ ചെയർമാൻ കാരായി ചന്ദ്രശേഖരൻ ടൈറ്റിൽ സ്പോൺസർമാർക്ക് ബ്രൗഷർ കൈമാറിക്കൊണ്ട് പ്രകാശന കർമ്മം നിർവഹിച്ചു.
മാഹി സ്പോർട്സ് ക്ലബ്ബിന്റെ ആഭിമുഖ്യത്തിൽ സംഘടിപ്പിക്കുന്ന ടൂർണ്ണമെന്റിൽ കേരള നിയമസഭ സ്പീക്കർ അഡ്വ. എ.എൻ. ഷംസീറാണ് മുഖ്യരക്ഷാധികാരി. വിജയികൾക്കായി ഡൗൺ ടൗൺ മാൾ ട്രോഫിയും ഗ്രാൻഡ് തേജസ് ഷീൽഡുമാണ് സമ്മാനമായി നൽകുന്നത്. റണ്ണേഴ്സിനായി ലക്സ്ഐ വി സലൂൺ ട്രോഫിയും ഐഫോക്സ് ടെക്നോളജിസ് ഷീൽഡും നൽകും.
മാഹി സ്പോർട്സ് ക്ലബ് ടൂർണ്ണമെന്റ് കമ്മിറ്റി ചെയർമാൻ അനിൽ വിലങ്ങിൽ അധ്യക്ഷത വഹിച്ച ചടങ്ങിൽ നിഖിലേഷ് കെ.സി. സ്വാഗതവും ജയരാജൻ അടിയേരി നന്ദിയും രേഖപ്പെടുത്തി. പ്രമുഖ കായിക താരങ്ങളും സ്പോൺസർമാരും ചടങ്ങിൽ സംബന്ധിച്ചു. ഇന്ത്യയിലെ വിവിധ ഭാഗങ്ങളിൽ നിന്നുള്ള പ്രമുഖ സെവൻസ് ടീമുകൾ അണിനിരക്കുന്ന ടൂർണ്ണമെന്റ് മാഹിയുടെ കായിക ഭൂപടത്തിൽ സുപ്രധാന സംഭവമായാണ് കണക്കാക്കപ്പെടുന്നത്.
