തലശ്ശേരി: റെയിൽവേ സ്റ്റേഷനിലെ ഓട്ടോ പാർക്കിംഗ് സംവിധാനത്തിൽ വരുത്തിയ മാറ്റങ്ങളിൽ പ്രതിഷേധിച്ച് സംയുക്ത ഓട്ടോ തൊഴിലാളി യൂണിയന്റെ നേതൃത്വത്തിൽ നാളെ (നവംബർ 16) രാവിലെ 6 മണി മുതൽ മറ്റന്നാൾ രാവിലെ 6 മണി വരെ 24 മണിക്കൂർ സൂചനാ പണിമുടക്ക് നടത്തും. സിഐടിയു, ഐഎൻടിയുസി, ബിഎംഎസ്, എസ്ടിയു എന്നീ സംഘടനകൾ സംയുക്തമായാണ് പണിമുടക്കിന് ആഹ്വാനം ചെയ്തിരിക്കുന്നത്. കോൾ ടാക്സി ഡ്രൈവേഴ്സ് യൂണിയനും സമരത്തിന് പിന്തുണ പ്രഖ്യാപിച്ചിട്ടുണ്ട്.
ഒന്നാം പ്ലാറ്റ്ഫോമിൽ നിന്ന് യാത്രക്കാർ പുറത്തേക്കിറങ്ങുമ്പോൾ എളുപ്പത്തിൽ കാണാവുന്ന രീതിയിലായിരുന്നു വർഷങ്ങളായി ഓട്ടോറിക്ഷകൾ പാർക്ക് ചെയ്തിരുന്നത്. എന്നാൽ സ്റ്റേഷൻ നവീകരണത്തിന് ശേഷം റെയിൽവേ അധികൃതർ പാർക്കിംഗ് വലതുഭാഗത്തേക്ക് ഏകദേശം 50 മീറ്റർ അകലെയായി പുനർനിശ്ചയിച്ചു. ഇതോടെ സ്റ്റേഷനിൽ ഇറങ്ങുന്ന യാത്രക്കാർക്ക് ഓട്ടോറിക്ഷകൾ കാണാൻ സാധിക്കാത്ത അവസ്ഥയാണ്. യാത്രക്കാർ ഇടതുഭാഗം വഴി പുറത്തുപോയി റെയിൽവേ പാസ് ഇല്ലാതെ പുറത്ത് പാർക്ക് ചെയ്യുന്ന വാഹനങ്ങളിൽ യാത്ര ചെയ്യുന്നതോടെ, പണം നൽകി റെയിൽവേയിൽ നിന്ന് പാസ് എടുത്ത തൊഴിലാളികൾക്ക് തൊഴിൽ നഷ്ടപ്പെടുന്ന സാഹചര്യമാണുള്ളത്.
രണ്ടാം പ്ലാറ്റ്ഫോമിലും സമാനമായ പ്രതിസന്ധിയാണ് നേരിടുന്നത്. മുൻപ് പാർക്ക് ചെയ്തിരുന്ന സ്ഥലം ഇപ്പോഴും ഒഴിഞ്ഞുകിടക്കുകയാണെന്നും, പാസെടുത്ത മുവായിരത്തി അഞ്ഞൂറോളം വരുന്ന ഓട്ടോ-ടാക്സി വാഹനങ്ങൾക്ക് ക്യൂ പാലിച്ച് പഴയ സ്ഥലത്ത് തന്നെ പാർക്ക് ചെയ്യാൻ അനുവാദം നൽകണമെന്നുമാണ് തൊഴിലാളികളുടെ ആവശ്യം.
പലതവണ റെയിൽവേ അധികൃതരുടെ ശ്രദ്ധയിൽപ്പെടുത്തിയിട്ടും അനുകൂല തീരുമാനമോ ചർച്ചയോ ഉണ്ടാകാത്ത സാഹചര്യത്തിലാണ് സമരത്തിലേക്ക് നീങ്ങുന്നതെന്ന് സിഐടിയു ജില്ലാ സെക്രട്ടറി ടി.പി. ശ്രീധരനും ഐഎൻടിയുസി നേതാവ് പി. ജനാർദ്ദനനും വ്യക്തമാക്കി. തൊഴിലാളികൾക്ക് ജീവിക്കാൻ ആവശ്യമായ വരുമാനം പോലും ലഭിക്കാത്ത സാഹചര്യമാണ് നിലവിലുള്ളതെന്നും ജനങ്ങൾ സമരത്തോട് സഹകരിക്കണമെന്നും നേതാക്കൾ അഭ്യർത്ഥിച്ചു.
