തലശ്ശേരി: ലഹരി വേട്ടയുടെ ഭാഗമായി എക്സൈസ് വകുപ്പ് പ്രത്യേകം സംഘടിപ്പിക്കുന്ന ഓപ്പറേഷൻ തണ്ടറിന്റെ ഭാഗമായി റെയിൽവെ പ്രൊട്ടക്ഷൻ ഫോഴ്സുമായി ചേർന്ന് തലശ്ശേരി റെയിൽവെ സ്റ്റേഷനിൽ നടത്തിയ സംയുക്ത പരിശോധനയിൽ രണ്ടാം പ്ലാറ്റ്ഫോറത്തിന്റെ ഒഴിഞ്ഞ ഭാഗത്ത് നിന്നും 8 കിലോ ഉണക്ക ക്കഞ്ചാവ് പിടികൂടി.
ചാക്കിൽ നിറച്ച് ഉപേക്ഷിച്ച നിലയിലാണ് കഞ്ചാവ് കെട്ട് കണ്ടെത്തിയത് - 6324 നമ്പർ മംഗലാപുരം, കോയമ്പത്തുർ-എക്സ്പ്രസ് കടന്നു പോയതിന് പിന്നാലെയാണ് ചാക്ക് കെട്ട് കാണപ്പെട്ടത്. ഉച്ചക്ക് 12-30 ഓടെയാണ് ഉദ്യോഗസ്ഥർ പ്ലാറ്റ്ഫോമിൽ പരിശോധന നടത്തിയത്.
കണ്ടെടുത്ത കഞ്ചാവിന് രഹസ്യ മാർക്കറ്റിൽ ഏതാണ്ട് 8 ലക്ഷം രൂപ വില വരും. ട്രെയിനിൽ കടത്തിക്കൊണ്ടു വരുന്നതിനിടയിൽ പോലീസ് ഉദ്യോഗസ്ഥരെ വെട്ടിക്കാൻ പ്ലാറ്റ്ഫോമിന്റെ ഒഴിഞ്ഞ ഭാഗത്ത് ചാക്ക് കെട്ട് തള്ളി ലഹരി കടത്തുകാരൻ മുങ്ങിയതാവാമെന്നാണ് സംശയിക്കുന്നത്.
രക്ഷപ്പെട്ടയാളെ കണ്ടെത്താൻ അന്വേഷണം തുടങ്ങിയതായി ഉദ്യോഗസ്ഥർ പറഞ്ഞു. ആർ.പി.എഫ്. എസ് ഐ മനോജ് കുമാർ, ഹെഡ് കോൺസ്റ്റബിൾ ഇ ടി കെ പവിത്രൻ, കോൺസ്റ്റബിൾ കെ റിബേഷ് , ആർപിഎഫ് ക്രൈം സ്ക്വാഡ് ഹെഡ് കോൺസ്റ്റബിൾമാരായ എം ബൈജു , ടി ബിജേഷ്, തലശ്ശേരി എക്സൈസ് ഇൻസ്പെക്ടർ ജി. ആദർശ്, അസി. ഇൻസ്പെക്ടമാരായ ടി.സന്തോഷ്,കെ.സി. ഷിബു, പ്രിവെന്റീവ് ഓഫീസർമാരായ കെ സുമേഷ്, കെ.പി റോഷി, എം കെ പ്രസന്ന, സിവിൽ എക്സൈസ് ഓഫീസർമാരായ സി.പി. രതീഷ്, കെ.സരിൻ രാജ് എന്നിവരാണ് പരിശോധനാ സംഘത്തിലുണ്ടായത്
