കരിപ്പൂർ: സ്വർണ മിശ്രിതം തുന്നിപ്പിടിപ്പിച്ച ജീൻസ് ധരിച്ച്‌ വിദേശത്തു നിന്നെത്തിയ യുവാവ് കരിപ്പൂർ പോലീസിന്റെ പിടിയിലായി.
ചൊവ്വാഴ്ച രാവിലെ ദുബായില്‍ നിന്ന് ഇൻഡിഗോ വിമാനത്തിലെത്തിയ താമരശ്ശേരി പൂനൂർ സ്വദേശി സഹീഹുല്‍ മിസ്ഫർ (29) ആണ് പിടിയിലായത്.
ജീൻസിന്റെ അടി ഭാഗത്ത് രണ്ടു പായ്ക്കറ്റുകളിൽ 340 ഗ്രാം സ്വർണ മിശ്രിതം തുന്നിപ്പിടിപ്പിച്ച നിലയിലാണ് പോലീസ് കണ്ടെടുത്തത്.
ഇതില്‍ 300 ഗ്രാം ശുദ്ധ സ്വർണം അടങ്ങിയിട്ടുണ്ടാകാനാണ് സാധ്യത. അങ്ങനെയെങ്കില്‍ 26 ലക്ഷത്തിലധികം രൂപ വിലവരും.
കസ്റ്റംസ് പരിശോധന കഴിഞ്ഞ് പുറത്തിറങ്ങിയ ഇയാളെ ജില്ലാ പോലീസ് മേധാവി ആർ. വിശ്വനാഥിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ പോലീസ് പിടികൂടി പരിശോധിക്കുകയായിരുന്നു.
മിസ്ഫറിനെ വിശദമായി ചോദ്യം ചെയ്തു വരുകയാണ്. സ്വർണക്കടത്തിനു പിന്നിലുള്ളവരെ കണ്ടെത്താനുള്ള ശ്രമം തുടരുകയാണെന്നും പോലീസ് അറിയിച്ചു.
