കണ്ണൂർ: തലശ്ശേരിക്കടുത്തെ പാലയാട് ലീഗല്‍ സ്റ്റഡീസ് യൂണിവേഴ്‌സിറ്റി ക്യാമ്പസിലെ ഹോസ്റ്റലില്‍ നിന്നും കെ.എസ്.യു നേതാവിനെ എസ്.എഫ്.ഐ പ്രവര്‍ത്തകര്‍ അക്രമിച്ചതായി പരാതി.
പത്തോളം വരുന്ന മുഖംമൂടി സംഘം ഹോസ്റ്റലില്‍ മാരകായുധങ്ങളുമായി അതിക്രമിച്ച്‌ കയറി ക്രൂരമായി മര്‍ദ്ദിച്ചുവെന്നാണ് പരാതി.
ഇന്ന് പുലര്‍ച്ചെ ഒന്നരയോടെ സംഘടിച്ചെത്തിയ അക്രമി സംഘത്തിന്റെ ഇരുമ്പ് വടി കൊണ്ടുള്ള അക്രമത്തില്‍ ഗുരുതരമായി പരിക്കേറ്റ ബിതുല്‍ ബാലനെ തലശ്ശേരി ഇന്ദിരാ ഗാന്ധി ആശുപത്രിയില്‍ പ്രവേശിപ്പിച്ചു. സൈക്കിള്‍ ചെയിന്‍ ഉള്‍പ്പടെയുള്ള മാരകായുധങ്ങളുമായി എത്തിയ സംഘം അക്രമം അഴിച്ചു വിട്ടുവെന്നാണ് പരാതി.
പാലയാട് ലീഗല്‍ സ്റ്റഡീസ് ക്യാമ്പസ് രണ്ടാം വര്‍ഷ നിയമ വിദ്യാര്‍ത്ഥിയായ ബിതുല്‍ ബാലന്‍ കെ.എസ്.യു കോഴിക്കോട് ജില്ലാ ജനറല്‍ സെക്രട്ടറിയാണ്. സംഭവത്തില്‍ ധര്‍മ്മടം പൊലിസ് കേസെടുത്ത് അന്വേഷണമാരംഭിച്ചിട്ടുണ്ട്.
