തലശ്ശേരി : തലശ്ശേരി സബ്ബ് ആർ ടി ഒയുടെ പരിധിയിലുള്ള സ്കൂൾ ബസ്സുകൾക്കായി പ്രീ മൺസൂൺ ചെക്കപ്പ് കാംപയിൻ മെയ് 22 നും 29 നും ആർ ടി ഓഫീസിന് സമീപമുള്ള ഗ്രൗണ്ടിൽ വച്ച് നടക്കുമെന്നും ആ ദിവസങ്ങളിൽ തലശ്ശേരി ആർ ടി ഒയ്ക്കു കീഴിലുള്ള എല്ലാ സ്കൂളിലെയും ബസ്സുകൾ കാംപയിനിൽ എത്തിക്കണമെന്നും തലശ്ശേരി ജോയിൻ്റ് ആർ.ടി.ഒ അറിയിച്ചു.
തലശ്ശേരി : റെയിൽവെ സ്റ്റേഷന് സമീപത്തുനിന്ന് മൊബൈൽ ഫോൺ തട്ടിപ്പറിച്ച സംഭവത്തിൽ മറുനാടൻ തൊഴിലാളിയെ പോലീസ് അറസ്റ്റ് ചെയ്തു. പശ്ചിമ ബംഗാൾ ബനിയാ ബുക്കൽ പാർക്കിലെ മുഹമ്മദ് സമീറിനെയാണ് (23) തലശ്ശേരി പോലീസ് അറസ്റ്റ് ചെയ്തത്.നഗരത്തിലെ കച്ചവടക്കാരനായ അബ്ദുൾ റഹിം നടന്നുപോകുമ്പോൾ പിന്നിൽനിന്ന് തള്ളിയിട്ട് മൊബൈൽ ഫോണും പേഴ്സും തട്ടിപ്പറിച്ചെന്നാണ് പരാതി. റെയിൽവേ സ്റ്റേഷൻ പരിസരത്തുനിന്നാണ് പ്രതിയെ അറസ്റ്റ് ചെയ്തത്.
തലശ്ശേരി : തലശ്ശേരിയിൽ ടൗണിലേക്ക് യാത്ര ചെയ്യുകയായിരുന്ന യുവതിയെ ഓട്ടോയിൽവെച്ച് മാനഭംഗപ്പെടുത്താൻ ശ്രമം.മാനഭംഗ ശ്രമം എതിർത്ത യുവതിയെ ഓട്ടോറിക്ഷയിൽ നിന്ന് തള്ളിയിട്ട് പരിക്കേൽപ്പിക്കുകയും ചെയ്തു.പ്രതികളായ ഓട്ടോ ഡ്രൈവർ വയലളം നങ്ങാറത്ത് പീടികയിലെ പ്രദീപൻ (60), യാത്രക്കാരനായിരുന്ന ചെമ്പിലോട് സ്വദേശി വിനോദൻ (56) എന്നിവരെ ന്യൂമാഹി എസ്.ഐ: അനീഷ് അറസ്റ്റ് ചെയ്തു.
കഴിഞ്ഞദിവസം രാത്രി എട്ട് മണിയോടെയായിരുന്നു സംഭവം. കോടിയേരി പാറാൽ സ്വദേശിനിയായ 47 കാരിയാണ് മാനഭംഗത്തിനിരയായത്.
ഓട്ടോക്ക് കൈകാണിച്ച് കയറിയ യുവതിയെ ഓട്ടോയിൽ ഡ്രൈവർക്കൊപ്പമുണ്ടായിരുന്നയാൽ യുവതിയോട് അപമര്യാദയായി പെരുമാരുകയായിരുന്നു . യുവതി എതിർത്തോടെ വഴിയിൽ തള്ളിയിട്ട ശേഷം ഓട്ടോറിക്ഷയുമായി പ്രതികൾ കടന്നുകളഞ്ഞു.
മുഖത്തും ചെവിക്കും മുറിവേറ്റ യുവതി നേരിട്ട് ന്യൂ മാഹി പോലീസ് സ്റ്റേഷനിലെത്തി പരാതി നൽകുകയായിരുന്നു.ന്യൂ മാഹിപോലീസ് രാത്രി തന്നെ അന്വേഷണം ആരംഭിക്കുകയും പ്രതികളെ അറസ്റ്റ് ചെയ്യുകയും ചെയ്തു.
തലശ്ശേരി :2023-24 അദ്ധ്യായന വർഷം എസ്എസ്എൽസി/പ്ലസ് ടു പരീക്ഷകളിൽ എല്ലാം വിഷയങ്ങളിലും ഫുൾ A+ നേടിയ തലശ്ശേരി നഗരസഭ പരിധിയിൽ സ്‌ഥിര താമസമുള്ള വിദ്യാർത്ഥികളെ നഗരസഭ അനുമോദിക്കുന്നു. അർഹരായ വിദ്യാർത്ഥികൾ അവരുടെ മാർക്ക് ലിസ്റ്റിന്റെ കോപ്പി, അഡ്രസ്, ഫോൺ നമ്പർ പഠിച്ച സ്കൂൾ എന്നിവ സഹിതം 25.05.2024 വൈകുന്നേരം 5മണിക്ക് മുൻപായി നഗരസഭ ഓഫീസിൽ എത്തിക്കേണ്ടതാണ് എന്ന് തലശ്ശേരി നഗരസഭ ചെയർപേഴ്സൺ അറിയിച്ചു.
തലശ്ശേരി : കണ്ണൂർ സർവ്വകലാശാലക്ക് കീഴിലുള്ള പാറാൽ ദാറുൽ ഇർഷാദ് അറബിക് കോളേജിൽ അറബിക്, ഇംഗ്ലീഷ് വിഷയങ്ങളിൽ ഗസ്റ്റ് അധ്യാപകരെ നിയമിക്കുന്നു.
മെയ് 31 രാവിലെ 10 മണിക്ക് യുജി / പിജി അറബിക് വിഭാഗത്തിലേക്കും 10.30 ന് അഫ്സലുൽ ഉലമ പ്രിലിമിനറി വിഭാഗത്തിലേക്കും 11 മണിക്ക് ഇംഗ്ലീഷ് വിഭാഗത്തിലേക്കുമുള്ള അഭിമുഖം കോളേജിൽ വെച്ച് നടക്കും.
കോഴിക്കോട് കോളേജ് വിദ്യാഭ്യാസ ഡെപ്യൂട്ടി ഡയറക്ടറുടെ കാര്യാലയത്തിൽ രജിസ്റ്റർ ചെയ്ത ഉദ്യോഗാർത്ഥികൾക്ക് പങ്കെടുക്കാം.
ഫോൺ: 9446650834, 9947138706
എരഞ്ഞോളി ഗ്രാമ പഞ്ചായത്ത് പരിധിയില്‍ സ്വകാര്യ വ്യക്തികളുടെ സ്ഥലത്ത് അപകടകരമായി നില്‍ക്കുന്ന മരങ്ങള്‍ കാലവര്‍ഷകെടുതിയില്‍ മറിഞ്ഞ്/ഒടിഞ്ഞ് വീണ് വ്യക്തികളുടെ ജീവനോ സ്വത്തിനോ അപകടം സംഭവിക്കാതിരിക്കാന്‍ മരങ്ങളുടെ ഉടമസ്ഥര്‍ മുന്‍കൂട്ടി സ്വന്തം ചെലവിലും ഉത്തരവാദിത്വത്തിലും മരങ്ങള്‍ മുറിച്ചു മാറ്റുകയോ വെട്ടി ഒതുക്കുകയോ ചെയ്യണമെന്ന് പഞ്ചായത്ത് സെക്രട്ടറി അറിയിച്ചു.
മരങ്ങള്‍ മുറിച്ച് മാറ്റാത്ത പക്ഷം ഇതിന്മേലുണ്ടാകുന്ന സകലമാന കഷ്ടനഷ്ടങ്ങള്‍ക്കും ദുരന്ത നിവാരണ നിയമം 2005 സെക്ഷന്‍ 30(2)(5) പ്രകാരം മരങ്ങളുടെ ഉടമസ്ഥര്‍ മാത്രമായിരിക്കും ഉത്തരവാദിയെന്നും സെക്രട്ടറി അറിയിച്ചു
തലശ്ശേരി:ഹജ്ജ് കമ്മിറ്റി മുഖേന ഹജ്ജിന് പോകുന്ന കൂത്തുപറമ്പ്, തലശ്ശേരി മണ്ഡലത്തിലെ 520 ഹജ്ജാജിമാർക്ക് വാക്സിനേഷൻ തലശ്ശേരി ജനറൽ ആശുപത്രിയിൽ നടത്തി.
മേയ് 16-ന് കല്യാശ്ശേരി, അഴീക്കോട്, കണ്ണൂർ, ധർമടം മണ്ഡലങ്ങളിലെ ഹജ്ജാജിമാർക്ക് കണ്ണൂർ ജില്ലാ ആസ്പത്രിയിലും
17-ന് പേരാവൂർ, മട്ടന്നൂർ മണ്ഡലങ്ങളിലെ ഹജ്ജാജിമാർക്ക് ഇരിട്ടി താലൂക്ക് ആശുപത്രിയിലും 21-ന് പയ്യന്നൂർ, തളിപ്പറമ്പ്, ഇരിക്കൂർ മണ്ഡലങ്ങളിലെ ഹജ്ജാജിമാർക്ക് തളിപ്പറമ്പ് താലൂക്ക് ആശുപത്രിയിലും വാക്സിനേഷൻ നടത്തും.
കണ്ണൂര്‍: പിണറായിയില്‍ തിളച്ച പാല്‍ നല്‍കി അഞ്ചു വയസുകാരന് പൊള്ളലേറ്റ സംഭവത്തില്‍ അംഗനവാടി അധ്യാപികക്ക് സസ്‌പെന്‍ഷന്‍. അംഗന്‍വാടി അധ്യാപിക വി രജിത, ഹെല്‍പ്പര്‍ വി ഷീബ എന്നിവരെയാണ് സസ്‌പെന്‍ഡ് ചെയ്തത്.
ജീവനക്കാര്‍ക്ക് വീഴ്ച സംഭവിച്ചെന്നും പൊള്ളലേറ്റിട്ടിട്ടും മേലധികാരികളെ അറിയിക്കാത്തത് പിഴവാണെന്നും കണ്ടെത്തിയതിനെത്തുടര്‍ന്നാണ് നടപടി.
സംസാരിക്കാന്‍ ബുദ്ധിമുട്ടുള്ള കുട്ടിക്ക് പൊള്ളലേറ്റിട്ടും ഉടന്‍ തന്നെ ആശുപത്രിയില്‍ എത്തിക്കാന്‍ അംഗന്‍വാടി ജീവനക്കാര്‍ തയ്യാറായില്ലെന്ന് കുട്ടിയുടെ അച്ഛന്‍ ആരോപിച്ചിരുന്നു.
ഈ മാസം ഏഴാം തിയതിയാണ് സംഭവം. മകന്റെ കീഴ്ത്താടിയില്‍ തൊലി പോകുന്നുണ്ടെന്ന് പറഞ്ഞ് കുട്ടിയുടെ അമ്മയെ അംഗന്‍വാടി ജീവനക്കാര്‍ വിളിച്ചു പറയുകയായിരുന്നു. കുട്ടിയുടെ വായും നാവും താടിയും മുഴുവനായി പൊള്ളലേറ്റ നിലയിലായിരുന്നു. കുട്ടിക്ക് പാല്‍ കൊടുത്തതാണെന്നായിരുന്നു ജീവനക്കാര്‍ പറഞ്ഞത്. തിളച്ച പാല്‍ കൊടുത്ത ശേഷം തുണി കൊണ്ട് തുടച്ചു. തുടച്ചപ്പോള്‍ തൊലി മുഴുവന്‍ ഇളകി വന്നു. ആശുപത്രിയില്‍ കൊണ്ടുപോകാനും തയ്യാറായില്ലെന്ന് കുട്ടിയുടെ പിതാവ് പറഞ്ഞിരുന്നു. സംഭവത്തില്‍ പൊലീസ് കേസെടുത്ത് അന്വേഷണം നടക്കുന്നതിനിടെയാണ് നടപടി
തലശ്ശേരി: കാഴ്ചപരിമിതി നേരിടുന്ന പത്ത് പേർക്ക് ധർമടത്ത് കരാട്ടെ പരിശീലന ക്യാമ്പും പിണറായിയിൽ നീന്തൽ പരിശീലനവും നൽകും.
കേരള ഫെഡറേഷൻ ഓഫ് ദ് ബ്ലൈൻഡ് ജില്ല യൂണിറ്റ്, സംഘടന യൂത്ത് ഫോറം, ബെംഗളൂരു ഇക്യുബിൻ ഫൗണ്ടേഷൻ എന്നിവയുടെ നേതൃത്വത്തിൽ ഗവ. ബ്രണ്ണൻ കോളേജ് ഹോസ്റ്റലിൽ ക്യാംപ് നടത്തി സെൻസായി സി എൻ മുരളി കരാട്ടെ പരിശിലനം നൽകും.
പിണറായി പഞ്ചായത്തിന്റെ അധീനതയിലുള്ള നീന്തൽ കുളത്തിൽ വച്ചാണ് നീന്തൽ പരിശീലനം. പരിശീലന പരിപാടി നാളെ രാവിലെ 8.30-ന് ഗവ. ബ്രണ്ണൻ കോളജ് പ്രിൻസിപ്പൽ ഡോ. ജെ വാസന്തി ഉദ്ഘാടനം ചെയ്യും.
തലശേരി:ഗവ .ബ്രണ്ണൻ കോളേജ് ഓഫ് ടീച്ചർ എഡ്യൂക്കേഷനിൽ ഫിസിക്കൽ സയൻസ്, നാച്വറൽ സയൻസ്, ഇംഗ്ലീഷ്, ഫൗണ്ടേഷൻ ഓഫ് എഡ്യൂക്കേഷൻ, പെർഫോമിങ് ആർട്‌സ്, ഫൈൻ ആർട്‌സ് എന്നീ വിഷയങ്ങളിൽ ഗസ്റ്റ് അധ്യാപകരെ നിയമിക്കുന്നു. കോളേജ് വിദ്യാഭ്യാസ വകുപ്പ് ഡെപ്യൂട്ടി ഡയറക്ടറേറ്റിന്റെ www.collegiateedu.kerala. gov.in വെബ്സൈറ്റ് മുഖാന്തരം രജിസ്റ്റർചെയ്ത ഉദ്യോഗാർഥികൾക്ക് അപേക്ഷിക്കാം. ബന്ധപ്പെട്ട വിഷയത്തിൽ 55 ശതമാനം മാർക്കോടുകൂടി ബിരുദാനന്തര ബിരുദവും (ഒബിസി നോൺക്രീമിലെയർ, ഭിന്നശേഷി വിഭാഗക്കാർക്ക് 50 ശതമാനം മാർക്ക് മതി) എംഎ ഡും നെറ്റ്/പിഎച്ച്ഡിയും ഉണ്ടായിരിക്കണം. അഭിമുഖം 22ന് രാവിലെ 10.30ന് കോളേ ജിൽ നടക്കും. ഫോൺ: 0490
2320227, 9567239932